“Balabilgə” elmi-kütləvi məktəbli dərgisinin üçüncü sayı işıq üzü görüb.

“Hədəf Nəşrləri” tərəfindən təsis edilən “Balabilgə” elmi-kütləvi məktəbli dərgisinin üçüncü sayı işıq üzü görüb.

Nəşriyyatdan Senet.az-a verilən məlumata görə, dərginin bu sayı “Alimləri tanıyaq” rubrikası altında “Dövrünü qabaqlayan dahi” araşdırması ilə açılır. Yazıda məşhur ixtiraçı Nikola Tesladan danışılır.

“Bir gün bir filmə baxdım...” rubrikasında isə son illərin ən uğurlu işlərindən olan “İşıq İli” – “Səhvlərlə yaşamağı öyrədən animasiya”dan söz açılır.

“Gəl STEAM oynayaq” rubrikasında bu dəfə uşaqların sevimlisi “Codey Rocky” (“Kodi Roki”) diqqət mərkəzindədir.

“Qəribə canlılar” rubrikasında isə panda qarışqaları, yarasa qulaqlı tülkü, pudel güvəsi kimi maraqlı həşərat və heyvanlar barədə araşdırma yer alır.

Bundan başqa, dərgidə kodlaşdırılmış hərflər, eləcə də üz ifadələri ilə bağlı çalışmalar, okeanda turşuluğun artması ilə bağlı təcrübələr verilib.

“Tarixi elmi ixtiralar” rubrikasında, telefonun, “Müasir elmi ixtiralar” rubrikasında isə günəş panellərinin ixtirasından danışılır.

“Kitabını göstər” rubrikasında “Bilgənin macəraları” silsiləsinin ikinci kitabı – “Səyyah Bilgə”dən söhbət açılır.

Oxucular qeyd olunan QR kod-u skan etməklə sözügedən kitab haqqındakı vloqu izləyə bilərlər.

Dərgi bir qayda olaraq krossvord və interaktiv oyunla başa çatır.

Qeyd edək ki, “Balabilgə” dərgisinin baş redaktoru Şəmil Sadiq, məsul redaktoru Səbuhi Şahmursoy, redaktoru Cavid Qədir, məsləhətçisi Nizami Hüseynov, koordinatoru Günel Rəcəbdir. Bundan başqa, Cavad Nur, Ləman Abdullayeva, Vəfa Alışzadə və Rəna Abdullayeva dərginin müəllifləri qismində çıxış edirlər.

Dərginin qiyməti 3 manatdır və illik abunə sistemi mövcuddur.

Abunə olmaq üçün 0772201222 nömrəsi ilə əlaqə saxlaya bilərsiniz.